Ховалыг, Кайгал-оол Ким-оол оглу

Кайгал-оол Ким-оол оглу Ховалыг (орус.  Кайгал-оол Ким-оолович Ховалыг , англ.  Kajgal-ool Kim-ool oglu Hovalyg август 20, 1960 төр.) — тыва хөөмейжи, ыраажы, делегейде ат-сураа билдингир «Хүн-Хүртү» деп хөгжүмчү бөлүктүң баштыңы болгаш тургузукчузу. Россияның Алдарлыг артизи, Тываның Улустуң хөөмейжизи.

Кайгал-оол Ким-оол оглу Ховалыг
Төрүттүнген хүнү	1960 августтуң 20(1960-08-20) (64 хар)
Чурт	ССРЭ  Россия

Кайгал-оол Ховалыг

Намдары

Кайгал-оол Ким-оол оглу 1960 чылдың август 20-де Тыва АССР-ниң Чөөн-Хемчик кожууннуң Бажың-Алаак сумузунга («Искра» совхозу) төрүттүнген. Тываның Күрүне Ансамблинче чалатырганың бертинде, 21 харлыынга дээр чылгычылап чораан. Кызыл хоорайже көшкеш, аңаа хөөмейлеп өөренип турган.

«Аян» ансамблинге 1979 чылдан тура хөөмейжи салымын эгелээн. Оларның хөөмей программазын Ленинград хоорайга белеткеп турган.

1989 чылда Коңгар-оол Ондар, Иван Сарыглар, Борис Херли, Вячеслав Данмаа, Сергей Ондар оон-даа өскелер-биле «Тыва» бөлүүнче кирген. Бөлүктүң удуртукчулары Тыва улустуң хөөмейжизи Геннадий Тумат болгаш хөөмей шинчилээр төптүң эртемдени Зоя Кыргыс. Олар болза улуг хөөмейжилерден ырыларын бижип ап турган.

Бодунуң чаа ажыдып алган «Хүн-Хүртү» бөлүүнге шупту күжүн бээр дээш, 1993 чылда «Тыва» бөлүктен үнүп алган. Кайгал-оол Ховалыг хөөмей, каргыраазы-биле бүгү делегейге алдаржаан.