Даг хой-караа

Даг хой-караа, Хой-караа (орус. «Астра альпийская», лат. "Aster alpinus") — нарын-чечектиглерге (Asteraceae) хамааржыр хөй тарытынып турар чараш чечектерлиг каасталгага ажыглаар чечектер янзызы.

Тывада хой-карааның 2 хевири өзүп турар. Эм чүүл кылдыр бо Даг хой-караа деп хевирин ажыглап турар. Ол чоон будукталчак көък дазылдарлыг болгаш сывы дорт хөй чылдыг үнүш. Бедии 6-40 см, сывында чаңгыс корзинкалыг. Бүрүлериниң кыдыы бүдүн, сывында бүрүлери ланцет хевирлиг, дазыл чоогунда бүрүлери элээн калбак.

Дылчыгаштыг чечектериниң өңү көк азы чидиг ягаан, а хоорзалыг чечектериниң – сарыг. Чечектелири: июнь-июль; чемиштерилири: июль-август.

Өзүп үнүп турар черлери: ховулар, дазырлар, көшкелер болгаш хаялар, чырык ине бүрүлүг, калбак бүрүлүг болгаш холушкак аргалар, оларның аяңнары, даштыг тундралар, тайга таскалдарында хөөлбектер чоогу.

Ажыглаары: сигениниң сугга хандызын өкпе туберкулёзунда, кеш аарыгларында (золотуха) болгаш ижин-шөйүндүнүң ажылы сандараанда, ижерин сүмелеп турар.

Өске дылдарда ады

Хой-карааны моолдап «Гол гэсэр», төвүттеп «Луг-миг».

Дөзүк

Серенот Станислав К. "Тыва улусчу эмнээшкин:эм оъттар, үнүштер, чааттар, мөөгүлер; моол, тибет, кыдат улусчу медициналар-биле чергелештирип бижээни". Тываның ном үндүрер чери, 2009. ISBN 5-7655-0636-4