Курбатская, Светлана Сүрүң кызы

Курбатская Светлана Суруновна (1937 чылдың январь 1-де, Тыва Арат Республиканың Эрзин суурга төрүттүнген) — география эртемнериниң доктору, профессор, Тыва Республиканың эртем талазы-биле алдарлыг ажылдакчызы, Россия Федерациязының дээди профессионал өөредилгезиниң хүндүлүг ажылдакчызы 2018 чылга чедир Тыва Республиканың болгаш Россияның эртемнер академиязының Сибирьде салбырының Биосфера шинчилээр Убсу-Нурнуң делегей чергелиг төвүнүң директору.

Светлана Сүрүң кызы Курбатская
Төрүттүнген хүнү:	01.01.1937 ч.
Төрүттүнген чери:	Эрзин
Эртем сферазы:	Тываның хөрзүн шывыы
Ажыл чери:	ККПИ, Тыва Республиканың болгаш Россияның эртемнер академиязының Сибирьде салбырының Биосфера шинчилээр Убсу-Нурнуң делегей чергелиг төвү
Альма-матер:	МКУ
Эртем деңнели:	география эртемнериниң доктору
Эртем удуртукчузу:	профессор Глеб Всеволодович Добровольский

Намдары

Кызылдың №2 ортумак школазын мөңгүн медальдыг дооскан. Москваның күрүне университединиң биология-хөрзүн факультедин "Агрохимия" эртемниг дооскаш, Тываның чер аайлаар экспедициязынче хөрзүн инженер-шинчилекчизи кылдыр чоргусттунган.

1963—1967 чылдарда — Кызылда күрүнениң педагогика институдунуң чаа тургустунган биология-химия факультединиң деканы.

Академик Г.В. Добровольскийниң эртем удуртулгазы-биле МКУ-нуң "Хөрзүн географиязы" кафедразының аспирантуразын дооскаш, "Тываның даглар аразында оргулааштарының хөрзүннүг шывыы болгаш биогеохимиязы" деп темага кандидат эртем чадазын камгалап алган.

1972—1980 чылдарда — Кызылда күрүнениң педагогика институдунуң эге өөредилге факультединиң деканы.

1980 чылдан Кызылда күрүнениң педагогика институдунга "География" деп специальность ажыттынган соонда География кафедразынга ажылдай берген. Россияның географтыг ниитилелиниң Тыва Республикада салбырының удуртукчузу (2001—2013).

География эртемнериниң доктору (2003), профессор (2010), Тыва Республиканың болгаш Россияның эртемнер академиязының Сибирьде салбырының Биосфера шинчилээр Убсу-Нурнуң делегей чергелиг төвүнүң директору (1991-2018).

Курбатская С. С. 130 ажыг ланшафт болгаш экосистеманың чидиг айтырыгларынга хамаарышкан эртем ажылдарының автору.

Өг-бүлези

Өөнүң ээзи - Курбатский Георгий Николаевич (1936 чылда төрүттүнген) — төөгүчү эртемден, аас чогаал шинчилекчизи, профессор, Тыва Республиканың өөредилгезиниң алдарлыг ажылдакчызы.

Шаңнал-макталы

• Тыва Республиканың алдарлыг ажылдакчызы (2003),
• Тыва Республиканың эртем талазы-биле алдарлыг ажылдакчызы (2005),
• Тываның күрүне университединиң хүндүлүг профессору (2006),
• Хунань экономиктиг география институдунуң хүндүлүг профессору (2000),
• "Музей ажыл херээнге тускай бердинген ажылы дээш" деп хүндүлүг демдек-биле шаңнаткан.

Шөлүлгелер

1. https://www.tuvaonline.ru/2013/10/11/po-trudu-i-pochet-professor-svetlana-surunovna-kurbatskaya.html

2. https://www.rgo.ru/ru/video/zhemchuzhina-tuvinskoy-nauki-svetlana-kurbatskaya-otmechaet-svoy-80-letniy-yubiley