Самба-Люндуп, Салчак Көк-Карак-оглу

Салчак Көк-Каракович Самба-Люндуп (декабрь 21, 1916 - февраль 6, 1981) — тыва шүлүкчү, чогаалчы, редактор. Тыва АССР-ниң культуразының алдарлыг ажылдакчызы.

Салчак Көк-Карак-оглу Самба-Люндуп
Төрүттүнген хүнү	1916 декабрьның 21(1916-12-21)
Мөчээн хүнү	1981 февральдың 6(1981-02-06) (64 хар)

Намдары

С.К.Самба-Люндуп 1916 чылдың декабрь 31-де Таңды-Тываның Даа кожууннуң Көөп-Сөөкке төрүттүнген. Бижик-билигге боду өөренгеш, КУТВ-ту (Чөөн чүк улустарының коммунистиг университеди) дооскаш, М.Горький аттыг Литература институдунга өөренип чораан.

«Аревэ шыны» солуннуң редакторунга, ТАР-ның Биче Хурал Президиумунуң секретарынга, Тываның каттышкан парлалга чериниң эргелекчизинге, Тываның ном үндүрер чериниң директорунга, «Шын» солуннуң редактору кылдыр ажылдап чораан.

Чогаал ажылын 1937 чылда эгелээн. Хөй шүлүктерни, очерктерни болгаш «Өскүс-оол» деп шүлүглелди бижээш «Аревэ шыны», «Шын» солуннарга, «Революстуң херели» сеткүүлге парлаткылаан. Тыва школаларга баштайгы өөредилге номнарын чогаадырынга болгаш редакторлаарынга киришкен. А.Пушкинниң «Капитан уруу», Н.Гогольдуң «Ревизор» деп чогаалдарын тыва дылче очулдуруган.

ССРЭ-ниң болгаш Тыва ААСР-ниң Чогаалчылар эвилелиниң кежигүнү. Тыва АССР-ниң культуразының алдарлыг ажылдакчызы.

1981 чылдың ферваль 6-да айыылдыг озал-ондакка таварышкаш мөчээн.

Дөс

• «Тываның чогаалчылары / Писатели Тувы» 2000 чылда үнген ном