Сулеймание́ мечеть (тур. Süleymaniye Camii) — Стамбулдуң эң улуг хемчээлдиг мусульман хурээзи, ниитизи-биле 5000 хире чүдүкчү чон кире берип болур[1]. Мечеть хоорайның эрги талазында, Вефа районунда.

Хүрээни Сулейман Тергиин султанның чарлыы-биле архитектор Синан 1550—1557 чылдарда тургузуп кылган. Бопуруунуң бедии 53 метр, калбаа 27,5 метр. Ол хемчээлдери-биле бедии-даа, калбаа-даа Ыдык Софияның византий хүрээзинге четпес болуп турар. Ыдык Софияның хурээзинде ышкаш бопуруун ийи чартык бопуруктар тудуп турар. Бопуруунда 32 соңга бар. Мечеть 1660 чылда өртке алыскан, 1766 чылда чер шимчээшкининиң үезинде бопуруунуң кезии кээп дүшкен турган.

Мечеть дөрт минарет дээр суургаларлыг, ол Сулейман Тергиин султанны Стамбулду эжелээн соонда дөрт дугаар чагырыкчы деп демдеглеп турар. Долгандыр балконнар, соңгалар-ла хөй. Хүрээниң ишти дыка чырык, чүге дизе ооң иштинче 136 соңгалардан долгандыр хүн чырыы кирип турар. Чунар бажың, медресе деп өөредилге чери, чем кылыр чер, библиотекалар, эмнелгелер-биле кады мечеть дыка улуг черни эжелеп, күчүлүг кылдыр көстүп турар[2]. Архитектуразының бир кезии кылдыр Сулеймание библиотеказы кирип турар. Ында VIII—XIX чүс чылдарда бижээн номнар чыындызын хостуг кирип номчуп, олар-биле таныжып болур.

Мечетьтиң хериминиң иштинде чевег бар, ында ийи кожа мавзолейлер иштинде Сулейман боду база ооң ынак өөнүң ишти Хюррем (Роксолана) оларның уруу Михримах-биле хөөржүттүнген.

Демдеглелдер эдер

  1. Джонатан Харрис. Византия. История исчезнувшей империи = JONATHAN HARRIS. The Lost World of Byzantium. — М.: Альпина Нон-фикшн, 2017.
  2. Харрис, 2017, с. 13.