Серен-оол, Владимир Седипович

Владимир Седипович Серен-оол (март 14, 1942 чыл – июнь 14, 1994 чыл) — тыва шүлүкчү, чогаалчы, драматург, очулдурукчу, Тываның алдарлыг чогаалчызы. ССРЭ-ниң Чогаалчылар эвилелиниң, Россияның Журналистер эвилелиниң болгаш театр ажылдакчыларының эвилелиниң кежигүнү. Тыва Республиканың Культура яамызының С. Сарыг-оол аттыг шаңналының лауреады.

Владимир Седипович Серен-оол
Төрүттүнген хүнү	1942 марттың 14(1942-03-14)
Мөчээн хүнү	1994

Намдары

В. Серен-оол 1942 чылдың март 14-те Тыва Арат Республиканың Улуг-Хем кожууннуң Өвүр-Торгалыгга төрүттүнген. Торгалыгның сес чыл, Хандагайтының ортумак школаларынга өөренгеш, Ленинградта Күрүнениң театр, музыка болгаш кинематография институдун база Москвада М. Горький аттыг литература институдунуң чанында Дээди курстарны дооскан.

«Тываның аныяктары» солуннуң литературлуг ажылдакчызы бооп, «Шын» солуннуң корреспондентизи кылдыр, Тываның хөгжүм-шии театрының артизи болуп, 1975 чылдан бээр театрның чогаал килдизиниң эргелекчизинге ажылдаан.

Чогаал ажылын 1960 чылдан эгелээн. «Сыгыт» деп баштайгы ному 1973 чылда чырыкче үнген, дараазында чылдарда «Солаңгы» (1977), «Хээлиг истер» (1989), «Каң-Кыс» (1991), «Белдир» (1993) деп номнары үнген. «Сөөскеннер чечектелип турда» деп шиилер ному 1995 чылда, ол мөчээн соонда чырыкче үнген. С. Маршактың, С. Могилевскаяның чогаалдарын, Ж-Б. Мольерниң, М. Тикоманунуң, У. Гаджибековтуң шиилерин тыва дылче очулдурган. Ооң чогаалдары орус, хакас, якут, моол дылдарже очулдуртунган.

Дөс

1. «Тываның чогаалчылары / Писатели Тувы» 2000 чылда үнген ном